अन्ततः प्रेमिकालाई थाइल्याण्डमा छाडेर एक्लै नेपाल आईपुगे पारस
काठमाण्डु, १८ चैत
लागुऔषध कारोबारमा संलग्न रहेको आरोपमा थाई जेलमा रहेका पूर्वयुवराज पारस शाह स्वदेश फर्केका छन् ।
पारस थाई एयरको जहाजमार्फत बिहीबार अपराह्न १ बजे काठमाण्डु आइपुगेका हुन् । उनले प्रेमिका थाई युवती कन्निका च्यानसाई लाई भने साथमा ल्याएका छैनन् ।
प्रेमिका नेपाल ल्याउन पाउनुपर्ने प्रस्ताव परिवारले अस्वीकार गरेपछि यसअघि पारस आउन मानेका थिएनन् । प्रेमिका र उनका भाइको षड्यन्त्रका कारण आफू लागुऔषध कारोबार मुद्धामा फसेको भन्दै पारस उनीसँग रिसाएका छन् ।
पारसको समर्थनमा विमानस्थमला केही युवाले ‘पारस सरकार जिन्दावाद’ भन्दै नाराबाजी गरेका थिए । उनी विमानस्थलबाट सीधै निर्मल निवास प्रस्थान गरेका छन् । पारस आउने भएपछि समाचार संकलनका लागि बाक्लो संख्यामा सञ्चारकर्मी विमानस्थल पुगेका थिए ।
पारस ४५ हजार थाई भाट धरौटी बुझाएर मंगलबार मात्र जेलमुक्त भएका थिए ।
पारसका साथमा उनलाई सहयोग गर्दै आएका ‘मातृभूमिका लागि युवा अभियान’ का संस्थापक सुनिल खड्का पनि नेपाल आएका छन् ।
0 comments
प्रतिक्रिया दिनुहोस्...